Është nxjerrë pas disa orësh trupi i pajetë i turistit në Valbonë. Turisti ra në humnerë mesditën e sotme, ku për pasojë humbi jetën.
Policia e Tropojës në një komunikatë për mediat sqaron ngjarjen. Sipas uniformave blu, turistët janë dëmtuar rëndë, duke eksploruar zonën e Valbonës. Pas disa orësh kërkimesh është bërë e mundur gjetja e tyre më vendin e quajtur “Qafë Valbonë”.
Sipas policisë, turistja M. S., 29 vjeçe ka deklaruar se po eksploronte zonën e Valbonës, së bashku me një turist tjetër, shtetasin D. J., 30 vjeç. Ky i fundit, duke u ngjitur në një shkëmb të thepisur, me dëborë, ka rrëshkitur dhe ka rënë në humnerë. Për pasojë i riu ka humbur jetën.
Trupi i pajetë i 30-vjeçarit është nxjerrë nga humnera, ndërsa turistja tjetër është transportuar me helikopter në spitalin e Tropojës.
Njoftimi i plotë i policisë:
Në lidhje me informacionin e dhënë më parë, për turistët e huaj të cilët janë dëmtuar rëndë, duke eksploruar zonën e Valbonës, ju informojmë se:
Shërbimet e Komisariatit të Policisë Tropojë, pas disa orësh kërkime, kanë bërë të mundur gjetjen e turistëve, në vendin e quajtur “Qafë Valbonë”.
Nga deklarimet paraprake të njërës prej turistëve, shtetases M. S., 29 vjeçe, rezulton se ajo po eksploronte zonën e Valbonës, së bashku me një turist tjetër, shtetasin D. J., 30 vjeç, i cili duke u ngjitur në një shkëmb të thepisur, me dëborë, ka rrëshkitur dhe ka rënë në humnerë, për pasojë ky shtetas ka humbur jetën.
Nga shërbimet e Komisariatit të Policisë Tropojë është bërë e mundur nxjerrja nga humnera e trupi të pajetë të shtetasit D. J.
Ndërsa shtetasja M. S. po transportohet me helikopter, në spitalin e Bajram Currit.
Grupi hetimor ndodhet në vendngjarje dhe po punon për sqarimin e plotë të rrethanave.