Zv.ndihmëssekretari amerikan i Shtetit, Matthew Palmer, tha dje se si vend anëtar i NATO-s, edhe Shqipëria është zgjedhur si pjesë e stërvitjes së aleancës “Defender Europe /21”, ku do të përfshihen 26 vende.
“Stërvitje ushtarake me disa vende të NATO-s, ne kemi zgjedhur edhe Shqipërinë që është anëtare e NATO-s”, tha Palmer.
Shqipëria do të jetë vendi mikpritës i stërvitjes me trupa të ushtrisë amerikane ‘Defender Europe/21’, e cila, që nga viti 1995, konsiderohet si një nga më të mëdhatë në Europë.
Stërvitja me trupa të ushtrisë amerikane ‘Defender Europe /21’, që nga viti 1995 konsiderohet si një nga më të mëdhatë në Europë. Kjo stërvitje, mikpritëse e së cilës do të jetë Shqipëria, do të drejtohet nga Komanda e Ushtrisë Amerikane në Europë.
Stërvitja do të zhvillohet nga 1 maj 14 qershor të këtij viti dhe do të shtrihet në disa vende të Ballkanit dhe të Detit të Zi. Në të do të marrin pjesë mbi 17 mijë trupa amerikane dhe 14 mijë të tjera nga 26 vende anëtare të NATO-s, që do të vënë në dispozicion të stërvitjes edhe mjete ushtarake. Sipas Ministrisë së Mbrojtjes, 4 mijë ushtarë amerikanë do të vendosen në Shqipëri dhe pjesa tjetër do të zhvendoset në vendet fqinje, përcjellë Panorama.
“Shqipëria është partnere strategjike e sigurisë amerikane në Europë”. Kështu e cilësoi Shqipërinë ushtaraku i lartë amerikan, Gjeneral Majori Joseph Jarrard, zëvendëskomandant i Ushtrisë së SHBA në Europë, gjatë një vizite që zhvilloi në Tiranë në fillim të shkurtit për këtë qëllim.
“Presim që Shqipëria të ketë një rol të rëndësishëm në këtë stërvitje madhore ushtarake. Ajo do të jetë një vend kryesor pritës për veprimtaritë e shumta ushtarake dhe kjo përforcon rëndësinë strategjike të gjeografisë së Shqipërisë në rajon”, theksoi zv.komandanti i trupave amerikane në Europë, Gjeneral Major Joseph Jarrard, në median sociale të Ambasadës amerikane në Tiranë.