Ministrja e Punëve të Jashtme, Donika Gërvalla, ka reaguar ndaj disa mediave, të cilat duke cituar një artikull në një media zvicerane, kanë shkruar se kinse ish pjesëtarët e UÇK-së vranë serbë, romë dhe shqiptarë oponent të UÇK-së.
Gërvalla, përmes një postimi në Facebook, ka thënë se artikulli në gazetën zvicerane NZZ është shkrim autorial i gazetarit të kësaj gazete dhe se e tëra kjo është një përsëritje e fushatës kundër saj nga disa media.
“Këmbëngulja e disave për të sulmuar dinjitetin dhe përkushtimin tonë për vendin nuk mund të funksionojë duke keqpërdorur UÇK-në. Në Kosovë gjithkush e din se kush e ka mbrojtur në të kaluarën dhe e mbron edhe sot UÇK-në, luftën çlirimtare dhe sakrificën e shqiptarëve jo vetëm gjatë dekadave të fundit”, ka shkruar Gërvalla.
Postimi i plotë i ministres Gërvalla:
“Sqarim:
Citati i mëposhtëm për UÇK-në, i marrë nga gazeta zvicerane NZZ ka vetëm një autor dhe ai quhet Andreas Reich, gazetar i kësaj gazete. Pra citați shpreh opinionin e gazetarit dhe jo timin. Një keqinformim i tillë mund të ishte evituar po të ishte lexuar dhe kuptuar mirë teksti dhe gjermanishtja, para se të citohet dhe botohet në forma të tilla.
Veçse një përsëritje e lodhtë e fushatës së përsëritur kundër nesh. Këmbëngulja e disave për të sulmuar dinjitetin dhe përkushtimin tonë për vendin nuk mund të funksionojë duke keqpërdorur UÇK-në. Në Kosovë gjithkush e din se kush e ka mbrojtur në të kaluarën dhe e mbron edhe sot UÇK-në, luftën çlirimtare dhe sakrificën e shqiptarëve jo vetëm gjatë dekadave të fundit.
Nuk e pres, por do të ishte korrekt një korrigjim i lajmit dhe një kërkimfalje nga ato media që e kanë botuar.
Natën e mirë!”, ka shkruar Gërvalla.