ESAD MEKULI
(17 dhjetor 1916 – 6 gusht 1993)
Më 17 dhjetor 1916, në Nokshiq të komunës së Plavës, u lind Esad Mekuli, akademiku, poeti, kritiku, përkthyesi shqiptar, redaktori, e kryeredaktori dhe presidenti i parë i Akademisë së Shkencave dhe Arteve të Kosovës. Mekuli ishte një figurë e gjithanshme, me kontribute mbresëlënëse në lëmin e kulturës shqiptare. Albanologu i shquar kanadezo-gjerman Robert Elsie e ka konsideruar Mekulin si themelues te poezisë moderne shqiptare në ish-Jugosllavi.
POPULLIT TIM, ESAD MEKULI
Deshta, shum’ kam dasht-dishrue
që me këng të trimnoj, me fjalen tënde të ndrydhun
të ngrej fuqitë prej gjumit…
këndova (dhe kur m’ishte ndalue)
se liria do të vinte edhe për ty, të përbuzun.
këndova mbi ditët fatlume që do të lindshin, pa dhun,
n’agimin e lirisë për ty me popujt këtu e ngjeti,
mbi forc të bashkimit mbarë:
mbi vrullin tand të mëshehun
-unë, biri yt dhe-poeti.
po! n’errsinën e shtypjes së randë sa shkambi,
ndëgjova thirrjet që të bana me dal n’dritë-
pse për liri-me tjerë
ke dhanë dhe ti
djers e gjak si etnit.
kam dhanë, i dashtun…dhe sot, në liri-
kur thembra e gjaksorit s’na shkel dhe dora pa
pranga mbeti,
me ty këndoj mbi fuqinë e ngjadhun nën yllin që na pri’
-unë, biri yt besnik dhe-poeti.