Është mbyllur procesi i votimit për zgjedhjet parlamentare në Malin e Zi. Gazetarët e Euronews Albania ishin në Mal të zi për të ndjekur më nga afër procesin zgjedhor në Malin e zi.
Në një raportim për Euronews Albania ata thanë se është mbyllur tashmë procesi i votimit, ndërsa pritet që pas pak të filloj procesi i numërimit të votave, i cili pritet të përfundoj pas disa orësh.
“Në të gjitha qendrat e votimit në komunën e Ulqinit është mbyllur me sukses procesi i votimit dhe duhet thënë se po kryhen procedurat e fundit për të nisur procesin e votimit, i cili pritet të përfundojë pas dy orësh.
Në komunën e Ulqinit nuk është paraqitur asnjë problematik ditën e sotme por ajo që vlen të theksohet është se pjesëmarrja ka qenë në nivelet më të luta që është regjistruar në zgjedhje.
Deri në këto momente bëhet fjalë për 50.8% pjesëmarrje në rang vendi në Malin e Zi, ndërsa nuk pritej në asnjë moment që pjesëmarrja të kalonte 60%”,-tha në një raportim nga Ulqini gazetari Teodor Gjergo.
Gazetari Ardit Hoxha në një lidhje direkte nga Tuzi, tha se për pak minuta do nisë procesi i numërimit të votave edhe në këtë komunë, ku shqiptarët presin që të nxjerrin një apo dy deputetë.
“Jam në komunën e Tuzit, duke qenë se në Tuz janë pritshmëritë e komunitetit shqiptar për të prodhuar një apo dy deputetë për Malin e Zi dhe mund të themi se vetëm pas pak minutash do të nisë dhe numërimi i votave”,-tha Ardit Hoxha.