Kryetari i Këshillit Kombëtar Shqiptar, Ragmi Mustafa, ka publikuar një super lajm, ku sot edhe zyrtarisht janë aprovuar tekstet mësimore të njësuara nga Republika e Shqiprisë, për nxënësit filloristë të Luginës së Preshevës.
“Sot është publikuar katalogu i teksteve mësimore në gjuhën shqipe nga Ministria e Arsimit, Shkencës dhe Zhvillimit Teknologjik“ – ka njoftuar Mustafa.
“Numri është rritur në 35 komplete të teksteve mësimore nga Shqipëria prej 61 teksteve të listuar. + 8 komplete të teksteve “gjuha serbe si gjuhë jo anëtare” me zotimin se edhe tekstet mësimore për klasën e katërt dhe të tetë aprovohen me implementimin e reformës për këto klasë” – ka shkruar ndër të tjera, Ragmi Mustafa, kryetar i KKSH-së.
Në vazhdim po ua paraqesim postimin e plotë të kryetarit Mustafa:
Që nga shtatori filloristët e Luginës do të përdorin të njëjtat tekste mësimore si bashkëmoshatarët e tyre në Tiranë.
Bashkë e bëmë të mundur, të pamundurën!
Arsimi në Luginë të trajtohet si çështje e madhe vlerash të përqendruar tek cilësia.
Sot është publikuar katalogu i teksteve mësimore në gjuhën shqipe nga Ministria e Arsimit, Shkencës dhe Zhvillimit Teknologjik.
Numri është rritur në 35 komplete të teksteve mësimore nga Shqipëria prej 61 teksteve të listuar. + 8 komplete të teksteve “gjuha serbe si gjuhë jo anëtare” me zotimin se edhe tekstet mësimore për klasën e katërt dhe të tetë aprovohen me implementimin e reformës për këto klasë.
Përveç, teksteve për lëndën e Historisë dhe Gjeografisë përmbyllet cikli i sigurimit të teksteve mësimore për shkollat fillore.
Ka ende punë e angazhim.
Megjithatë, radhën tashmë të fokusimit e kanë tekstet mësimore për shkollat e mesme.
Faleminderit me mirënjohje të thellë Ministrisë së Arsimit, Sportit e Rinisë të Shqipërisë, në veçanti ministres Besa Shahini!
Faleminderit për mirëkuptim nga Ministria e Arsimit, Shkencës dhe Zhvillimit Teknologjik e Trupit Koordinues për Preshevë Bujanoc dhe Medvegjë!
Faleminderit shtëpisë botuese “Albas” në Preshevë!
Faleminderit me konsideratë të lartë për Misionin e OSBE-së dhe ambasadorët e Quintit si dhe ambasadorët e grupit jo formal “Miqtë e Luginës”.
