Oficeri Radule Bojovic në një foto të shpërndarë nga Departamenti i Policisë së Hanover Park.
(Foto: Departamenti i Policisë së Hanover Park përmes CNN Newsource)
Një ngjarje e pazakontë ka tronditur opinionin publik në SHBA, pasi një oficer policie në Hanover Park, pranë Çikagos, është arrestuar nga Shërbimi Amerikan për Imigracion dhe Dogana (ICE), nën dyshimin se kishte hyrë dhe qëndruar në vend në mënyrë të paligjshme.
Sipas raportimit të WBAL-TV, i arrestuari është Radule Bojovic, me origjinë nga Mali i Zi, i cili kishte hyrë në Shtetet e Bashkuara me vizë turistike që kishte skaduar në vitin 2015. Megjithatë, ai kishte arritur të punonte si oficer policie në Hanover Park dhe së fundmi kishte përfunduar trajnimin në Akademinë e Zbatimit të Ligjit për Zona Suburbane.
Zyrtarët e Departamentit të Sigurisë Kombëtare konfirmuan se Bojovic kishte jetuar në SHBA për afro 10 vjet pa status ligjor të vlefshëm.
“Ky individ shkelte ligjet e vendit tonë dhe jetonte këtu në mënyrë të paligjshme për një dekadë. Është e papranueshme që një person pa status të ligjshëm të mbajë badge policie dhe armë zjarri,” deklaroi Ndihmës Sekretarja e DHS, Tricia McLaughlin.
Ky rast ka hapur debat mbi mënyrën e verifikimit të oficerëve të policisë në disa shtete amerikane dhe proceset e kontrollit të dokumentacionit gjatë punësimit në institucionet e sigurisë publike.
📰 Burimi: WBAL-TV
✍️ Përgatiti: Redaksia e “Plava e Gucia Sot”