Policia Rajonale e Pejës, ka konfirmuar se sot ka arrestuar shoferët e dy maunave me targa të Serbisë. Në njërën prej maunave ka qenë fotografia e presidentit të Rusisë, Vladimir Putin, e në maunën tjetër fotografia e Vuk Karaxhiqit. “Sot pasdite janë ndaluar dy maune nga zyrtarët policorë të Pejës. Vozitësit janë shoqëruar në Stacion Policor, ku janë duke u intervistuar”, tha zëdhënësi i Policisë së Pejës, Fadil Gashi. Mësohet se maunat kanë qenë të ngarkuara me mazut dhe ngarkesa ka qenë e porositur nga një kompani derivatesh, por se nga cila, nuk ka të dhëna ende.
Për këtë rast, siç tha ai, është njoftuar edhe Prokuroria Themelore e Pejës. “Lidhur me qarkullimin e disa videove në rrjetet sociale ku shihen kamionë me fotografi të disa personaliteteve, Prokuroria Themelore në Pejë ka autorizuar Policinë e Kosovës që të shoqërojë për në stacion policor shoferët dhe të njëjtit të intervistohen lidhur me mënyrën e hyrjes së tyre në Kosovë, qëllimin dhe çështje të tjera me rëndësi. Pas ndërmarrjes së veprimeve parahetimore do të vlerësohet për veprimet e mëtejmë”, tha zëdhënësi i kësaj prokurorie, Shkodran Nikçi./ Plava e Gucia Sot