Gregory Meeks dhe Carolyn Maloney janë dy figura qendrore të Kongresit dhe miqësia me ta është një pasuri e rëndësishme për komunitetin shqiptaro-amerikan dhe lobimin shqiptar në SHBA
Nga Ruben Avxhiu
Kosova dhe marrëdhëniet shqiptaro-amerikane ishin në qendër të një takimi miqësor të komunitetit tonë me tre kongresistë të fuqishëm në Manhattan.
Darka synonte mbledhjen e fondeve për kongresistët Gregory Meeks dhe Mondaire Jones. Për ata që nuk e dinë, Meeks është kryetari i fuqishëm i Komitetit të Punëve të Jashtme në Dhomën e Përfaqësuesve. Ai ka zëvendësuar në këtë detyrë mikun tonë, Eliot Engel.
Kongresisti Jones është përfaqësues i një zone në Westchester dhe Putnam, ku banojnë shumë shqiptaro-amerikanë, dhe një nga yjet në ngritje të Partisë Demokrate.
Takimi u organizua nga Vehbi Bajrami, botues i gazetës “Illyria” dhe Elio Ahmetaj, pronar i restorantit të njohur “Allora”, në Manhattan. Të dy veprimtarët e njohur të komunitetit kanë bashkuar forcat edhe më parë për të lobuar për çështjen kombëtare.
Me ftesën e tyre në takim mori pjesë edhe kongresistja e fuqishme Carolyn Maloney, kryetare e Komitetit të Mbikqyrjes në Dhomën e Përfaqësuesve, anëtare e hershme e Kaukusit të Çështjeve Shqiptare në Kongresin Amerikan. Botuesi Bajrami ka organizuar takime fondmbledhëse për të në të kaluarën.
“Nuk kishte si të mungoja”, u shpreh ajo, për darkën mes shqiptarëve. “Allora Restaurant është në distriktin tim dhe jam e gëzuar që dy kolegët e mi kanë ardhur këtu për vizitë”.
Darka ishte e pasur me ushqime dhe pije të shumëllojshme, falë bujarisë mikpritëse të pronarit Elio Ahmetaj. Ai i falenderoi pjesëmarrësit duke uruar për mbrëmje më të shpeshta për të ndihmuar Kosovën dhe kombin shqiptar.
Meeks dhe Maloney janë dy figura madhore të Kongresit dhe miqësia me ta është një pasuri e rëndësishme për komunitetin shqiptaro-amerikan dhe lobimin shqiptar në SHBA.
Darkën e drejtoi Christopher Hyland, njeriu që prezantoi komunitetin shqiptar me kandidatin për President, Bill Clinton, në vitin 1992. Në fjalën hapëse, ai falenderoi veçanërisht, botuesin Bajrami që vazhdimisht organizon takime të tilla me rëndësi historike.
Në prezantimin e tij, ai i ftoi shqiptarët që të punojnë për ta mbyllur përfundimisht konfliktin, me ndërmjetësinë e SHBA-së për të arritur një marrëveshje që do ta bënte Serbinë të pranonte pavarësinë e Kosovës.
Mes të ftuarve ishte Ambasadori i Shqipërisë në OKB, Ferit Hoxha, që tani përfaqëson vendin edhe në Këshillin e Sigurimit, ku Shqipëria do të jetë anëtare për këto dy vite. Vetëm një ditë më parë, Shqipëria ishte radhitur në krah të Shteteve të Bashkuara, për t’iu përgjigjur kërcënimit ushtarak të Rusisë dhe tani ndodhej në të njëjtën tavolinë me kongresistin Meeks që drejton Marrëdhëniet me Jashtë në Dhomën e Përfaqësuesve.
Ambasadori Hoxha tha në prezantimin e tij, se puna për të siguruar njohjen e plotë të pavarësisë së Kosovës mbetet një nga përparësitë e tij dhe të Misionit Shqiptar në OKB.
Ambasadori Ferit Hoxha i dhuroi me këtë rast biznesmenit Christopher Hyland, në emër të Presidentit të Shqipërisë, Ilir Meta, “Urdhërin e Kalorësit të Skënderbeut”. Ai lavdëroi rolin e Hylandit në periudhën e viteve 1990, kur shqiptaro-amerikanët po përpiqeshin të njihnin demokratin Clinton me çështjen e Kosovës dhe demokracisë në Shqipëri.
Mori pjesë edhe Ambasadori Frymezim Isufaj, që drejton Konsullatën e Kosovës në New York.
Ai tha se Kosova nuk ishte ende anëtare e OKB-së por ishte optimist se në fund do të zinte vendin e merituar në komunitetin ndërkombëtar. Ai falenderoi të tre kongresistët për ndihmën e tyre për Kosovën.
“Unë kam punuar në Washington”, tha Ambasadori Isufaj, “dhe e njoh kontributin tuaj, sidomos me kryetarin e Komitetit të Punëve të jashtme, kongresistin Meeks, me zyrën e të cilit kemi bashkëpunuar shumë”.
Ai la për në fund të takimit komplimentin më të madh për shqiptarët e mbledhur aty. Përpara se të kishte ambasadorë nga Kosova në këtë vend, “ju keni qenë ambasadorët e saj të pazëvendësueshëm”, tha ai.
Botuesi i gazetës “Illyria”, Vehbi Bajrami u foli kongresistëve për lidhjet e thella historike shqiptaro-amerikane dhe rëndësinë e rolit amerikan sot në Kosovë e në Ballkan, Në një kohë kur Rusia dhe Kina po armatosin dhe fuqizojnë Serbinë, SHBA duhet të jetë më e vendosur për fuqizimin e Kosovës dhe të faktorit shqiptar. Një mjet i rëndësishëm është padyshim rritja e fondeve për Kosovën në Ndihmën e Jashtme të SHBA-së dhe përforcimi me mjete dhe fonde i Ushtrisë së Kosovës. SHBA gjithashtu duhet të ushtrojë presion mbi pesë vendet e BE-së që ende nuk e njohin pavarësinë e Kosovës.
“Nuk do të ketë paqe dhe stabilitet në Ballkan derisa Serbia të njohë Kosovën”, tha ai. Paqja ka nevojë edhe për drejtësi. Serbia duhet të detyrohet të njohë krimet dhe të lejojë drejtësinë të ndëshkojë krimet e luftës.
“Janë 20,000 përdhunime që presin përgjigjen e drejtësisë”, tha Vehbi Bajrami në fjalën e tij. Më shumë se një mijë të humbur që dergjen në varre masive, vendodhjen e të cilëve Serbia nuk e tregon. Ai përmendi edhe çështjen e tre Vëllezërve Bytyçi. Kongresi miratoi një rezolutë unanime për çështjen e tyre dhe Serbia vazhdon ta injorojë. Është në nderin e Kongresit që ta ndjekë këtë çështje deri në fund.
Me këtë rast, botuesi Bajrami u dorëzoi tre kongresistëve një dokument me dhjetë pika, ku qartësohen shkurt dhe në thelb kërkesat e shqiptarëve për Kosovën dhe rajonin. Ai i përmendi në fjalën e tij disa prej tyre. Kosova nuk mund të pranojë një “Republika Srpska” të dytë pasi pamë se çfarë ndodhi në Bosnje. Nga ana tjetër, duhet ndalur urgjentisht pasivizimi i adresave të pakicës shqiptare në Serbi. Të drejtat dhe privilegjet e pakicave duhet të pasqyrojnë njëra-tjetrën në të dy anët e kufirit Kosovë-Serbi.
“Kosova mund të bëhet një Izrael i Europës”, tha ai, duke nënvizuar se në asnjë vend të botës, SHBA nuk gëzon aq shumë popullaritet sa në Kosovë.
Të tre kongresistët e ftuar morën fjalën dhe vlerësuan komunitetin shqiptaro-amerikan. Ata premtuan se do të bashkëpunojnë që zëri i shqiptarëve të dëgjohet në Washington dhe që SHBA të drejtohet nga politika që thellojnë marrëdhëniet shqiptaro-amerikane dhe rrisin praninë dhe udhëheqjen amerikane në Ballkan.
Kongresisti Mondaire Jones falenderoi në veçanti botuesin Bajrami. “Nuk ma priti mendja që do të dilte një takim kaq i bukur”, tha ai. “Vërtet që ke bërë diçka të jashtëzakonshme”. Ai tha se e konsideronte veten një nxënës të dy kolegëve dhe i falenderoi për ndihmën që i kishin dhënë në Kongres.
Kongresisti Gregory Meeks premtoi në lamtumirën e tij ndaj kongresistit Engel se do të vazhdonte rrugën e tij edhe për Kosovën. Mirëpo, pak është bërë në këto dy vjet për ta afruar me komunitetin. Kjo darkë ishte një hap i mirë në rrugën e duhur.
Në fjalën e tij, ai tha se SHBA dhe komuniteti ndërkombëtar duhej të bënin më shumë për njohjen e pavarësisë së Kosovës dhe se më shumë presion duhej ushtruar që Serbia ta njohë pavarësinë e Kosovës. Meeks ka qenë pjesëmarrës në shumë rezoluta dhe nisma për Kosovën dhe premtoi ta rikthente në vëmendjen e tij procesin. Ai i ftoi shqiptarët e mbledhur që të mos e nënvleftësojnë kolegun e tij Jones, se ndonëse i ri në moshë dhe në Kongres, ai është një nga udhëheqësit e ardhshëm të demokratëve në Washington.
“Duam drejtësi për vëllezërit Bytyçi”, tha kryetari i Komitetit të Punëve të Jashtme, Meeks. Të tre kongresistët u shprehën të vendosur se SHBA nuk do të heqë dorë derisa vrasësit të përballen me drejtësinë.
Këta janë në fakt, kongresistë që me peshën e tyre ata mund të luajnë rol ndikues në Administratën e Presidentit Joe Biden.
Në darkë mori pjesë edhe një prej dy vëllezërve të mbijetuar, Ilir Bytyçi, që kanë dhënë gjithshka që të mos harrohet sakrifica e tyre dhe që drejtësia të vihet në vend. Ai falenderoi kongresistët dhe në veçanti kryetarin Meeks për kontributin e tyre në këtë drejtim. Ai tha se ai dhe familja e tij marrin zemër nga solidariteti i komunitetit që nuk i ka harruar tre bijtë e tij. Pjesëmarrja e tij ishte një premtim se përpjekjet për drejtësi nuk do të ndalen kurrë.
“Sot kemi shumë nevojë për ju”, u tha tre kongresistëve veprimtari i shquar i komunitetit tonë, Jim Xhema. Ai tha se i përkiste një brezi të vjetër që ka punuar shumë e që ndonëse duket se ka dalë në pension do të vazhdojë të jetë aktiv, më shumë në prapaskenë për të mbaruar rrugën e nisur.
Një nga të rinjtë e komunitetit ishte i pranishëm në darkë: Premtim Ahmetaj i cili ka arritur një sukses të bujshëm në biznes për të cilin kemi shkruar më parë, në gazetën “Illyria”. Suksesi i tij me kompaninë Butler Hospitality është çmuar nga Revista e famshme e biznesit amerikan “Forbes”.
Marash Nucullaj ishte një pjesëmarrës që kishte udhëtuar nga Detroiti për të dëshmuar se shqiptarët mbeten të bashkuar pavarësisht se nga cilat troje vijnë e ku banojnë në SHBA. Ai falenderoi Vehbi Bajramin për nismën e riaktivizimit të lobimit shqiptar në SHBA.
Vehbi Bajrami ishte shumë i drejtpërdrejtë me kongresistët. Ai tha se shqiptarët do të mblidhen përsëri për ta, do t’i ndihmojnë me fonde dhe vota. Gazeta “Illyria” do të jetë gjithmonë e hapur për ta për t’i mbështetur. Por, mbështetja për Kosovën, Shqipërinë dhe shqiptarët në Ballkan është edhe në interesin e vetë Amerikës. Ishte një ftesë e fortë për bashkëpunim.
Ai falenderoi në veçanti biznesmenin dhe aktivistin Jim Xhema që ka frymëzuar atë dhe shumë shqiptarë të tjerë që të punojnë për atdheun.
Xhema e mbështeti menjëherë duke u thënë kongresistëve se puna e tyre do të vlerësohet dhe se ai personalisht do të angazhohej për t’i ndihmuar në çdo hap.
David Philip, ish-diplomat e studjues, që ka punuar shumë me çështjen e Kosovës u tha kongresistëve se sa kohë që nuk e përfundoni konfliktin e Kosovës, duke detyruar Serbinë që ta njohë, do të keni në Ballkan një pikë ku Rusia mund të ndërhyjë për të dëmtuar interesat e paqes dhe demokracisë.
Ai propozoi që të fillohej që nga mbyllja e misionit të panevojshëm të UNMIK-ut për t’ia hequr Rusisë justifikimin e ndërhyrjes në Kosovë.
Kongresistja Maloney tha se kjo darkë e ka frymëzuar shumë që kur të kthehet në Washington të bëjë shumë më tepër që Kosova të njihet plotësisht e të zërë vendin në OKB. Ajo tha se Gregory Meeks është figura kryesore që mund të udhëheqë një përpjekje të re në mbështetje të Kosovës që ta çojmë punën deri në fund.
“Për mua ju jeni heronj e heroina”, tha ajo. “E nisët punën kur Kosovën nuk e njihte njeri dhe tani ajo është një vend i pavarur dhe demokratik. Ne kemi bërë disa punë të mira në Kongres, por ju keni krijuar një vend të ri. Nuk ka gjë më të madhe se kjo”.
Në fund, Vehbi Bajrami i ftoi të tre kongresistët që të vizitojnë Kosovën në kuadrin e një udhëtimi faktmbledhës në rajonin. Ata e pranuan ftesën me kënaqësi dhe premtuan se do të planifikojnë një udhëtim së shpejti.
Takimin përveç gazetës “Illyria” e mbuloi edhe gazetari Halil Mula, korrespondent i TV21 nga Kosova.
(Fotografitë nga Olsi Beci)
