NEW YORK — Në shenjë nderimi për jetën dhe kontributin e tij të gjatë publik, shteti i New York ka urdhëruar uljen e flamujve në gjysmështizë në nder të ish-kongresistit të njohur amerikan Eliot Engel, i cili ndërroi jetë në moshën 79-vjeçare.
Urdhri për uljen e flamujve është dhënë nga guvernatorja e shtetit, Kathy Hochul, e cila theksoi se Engel ishte një shërbyes i palodhur publik dhe një figurë me ndikim të madh në jetën politike të shtetit dhe të vendit.
Në deklaratën e saj, guvernatorja Hochul vlerësoi kontributin e Engel gjatë dekadave të shërbimit të tij në Kongresin amerikan, duke theksuar përkushtimin e tij ndaj komuniteteve që përfaqësonte në Bronx dhe Westchester, si dhe angazhimin e tij në politikën e jashtme amerikane.
Eliot Engel shërbeu për më shumë se tri dekada në Dhomën e Përfaqësuesve të Shteteve të Bashkuara dhe ishte një ndër zërat më të fuqishëm në mbështetje të çështjeve të drejtësisë ndërkombëtare dhe të aleatëve të Shteteve të Bashkuara. Ai njihej gjithashtu si një mik i madh i komunitetit shqiptar dhe një mbështetës i palëkundur i çështjes së Kosovës dhe të drejtave të shqiptarëve në Ballkan.
Ulja e flamujve në gjysmështizë në të gjithë shtetin e New York-ut përbën një nderim zyrtar dhe simbolik për figurën dhe trashëgiminë politike të Engel, duke reflektuar respektin e institucioneve shtetërore për kontributin e tij shumëvjeçar.
Redaksia e portalit “Plava e Gucia Sot” shpreh dhimbjen e saj për humbjen e një miku të madh të shqiptarëve dhe i shpreh ngushëllimet më të sinqerta familjes Engel, bashkëpunëtorëve dhe gjithë komunitetit që e çmonte dhe respektonte veprën e tij.