Java e Flamurit 2026: Plava dhe Gucia pjesë e festimeve madhështore për 28 Nëntorin – publikohet programi i aktiviteteve

Me rastin e 28 Nëntorit – Ditës së Flamurit Kombëtar, Këshilli Kombëtar i Shqiptarëve në Malin e Zi ka publikuar programin e aktiviteteve festive dhe kulturore që do të organizohen nga data 20 deri më 28 nëntor 2026, në disa treva shqiptare në Mal të Zi. Një vend të veçantë në këtë program zënë Plava dhe Gucia, ku janë paraparë aktivitete për nder të festës sonë kombëtare.

Nën moton “28 Nëntor – Gjuha, Kultura dhe Flamuri”, Java e Flamurit do të bashkojë shqiptarët përmes koncerteve festive, veprimtarive letrare, shfaqjeve teatrore dhe manifestimeve të tjera që synojnë ruajtjen dhe promovimin e identitetit, gjuhës, kulturës dhe traditave kombëtare.

Gucia feston më 26 nëntor

Në Guci, aktivitetet festive do të zhvillohen të enjten, më 26 nëntor 2026, në orën 13:00, në Shtëpinë e Kulturës, ku do të mbahet një program kulturor festiv.

Ky aktivitet organizohet nga Lëvizja për Guci, në bashkëpunim me Këshillin Kombëtar të Shqiptarëve në Malin e Zi.

Plava me koncert festiv më 27 nëntor

Festimet do të vazhdojnë në Plavë, të premten, më 27 nëntor 2026, në orën 12:30, në Shtëpinë e Kulturës, ku do të organizohet një koncert festiv kulturor.

Organizatorë të këtij manifestimi janë SHKA “Maja e Karanfilit” dhe OJQ “Alpet Shqiptare”, me mbështetjen e Këshillit Kombëtar të Shqiptarëve në Malin e Zi.

Ky aktivitet do të jetë një mundësi e veçantë që qytetarët e Plavës dhe Gucisë të mblidhen së bashku për të kremtuar Ditën e Flamurit dhe për të shprehur krenarinë për trashëgiminë e tyre kombëtare.

Më 28 nëntor, defile me automjete në Guci

Në ditën e festës kombëtare, të shtunën, më 28 nëntor 2026, në orën 12:00, në Guci do të organizohet një defile me automjete, me pikënisje nga Stacioni i Autobusëve.

Edhe ky aktivitet organizohet nga SHKA “Maja e Karanfilit” dhe OJQ “Alpet Shqiptare”, me mbështetjen e Këshillit Kombëtar të Shqiptarëve në Malin e Zi.

Defileja pritet t’i japë një atmosferë të veçantë festive Gucisë në ditën që simbolizon bashkimin, krenarinë dhe identitetin kombëtar shqiptar.

Aktivitete festive edhe në trevat e tjera shqiptare

Përveç Plavës dhe Gucisë, Java e Flamurit përfshin një sërë aktivitetesh edhe në Rozhajë, Ulqin, Katërkollë, Ostros, Tivar dhe Tuz.

Programi nis më 20 nëntor në Rozhajë me manifestimin “Festojmë shqip për trojet tona”, ndërsa më 22 nëntor në Ulqin do të promovohet libri i Begzad Baliut, “Letërkëmbimi i Ismail Dodës me profesor Eqrem Çabejn”.

Më 24 nëntor, në Katërkollë do të mbahet takimi letrar “Kur fjala bëhet atdhe”, ndërsa më 25 nëntor janë paraparë një pritje në Ostros dhe shfaqja teatrore “Përtej hekurave”, nga Teatri Shqiptar në Shkup, në Ulqin.

Më 27 nëntor, në Tivarin e Vjetër do të organizohet pritja “Na bashkon gjuha dhe flamuri”.

Ndërkaq, më 28 nëntor, në Ulqin do të mbahet Takimi i Parë Mbarëkombëtar i FORUM-it 26, me temën “Shqipja – Atdheu ynë i përbashkët”, ndërsa në Tuz do të organizohet një koncert festiv nga SHKA “Koha”.

28 Nëntori – festë e krenarisë dhe identitetit kombëtar

Për shqiptarët e Plavës dhe Gucisë, 28 Nëntori mbetet një nga datat më të rëndësishme të kalendarit kombëtar, që rikujton shpalljen e Pavarësisë së Shqipërisë dhe simbolizon përkatësinë e përbashkët kombëtare.

Aktivitetet e këtij viti krijojnë mundësi për të bashkuar komunitetin, për të promovuar vlerat kulturore dhe për t’ua përcjellë brezave të rinj dashurinë për gjuhën, flamurin dhe traditat shqiptare.

Organizatorët ftojnë qytetarët që të marrin pjesë në këto manifestime dhe të festojnë së bashku 28 Nëntorin – Ditën e Flamurit Kombëtar.

Plava e Gucia Sot